Abanyamakuru batatu bafunzwe bashinjwa guha urubuga umutwe leta ya Ethiopia ivuga ko ari uw’iterabwoba, bijyendanye n’amategeko yo mu bihe by’intambara yashyizweho mu gihugu.

Polisi ivuga ko abo banyamakuru barenze ku itegeko ry’igihugu ryo muri ibi bihe bidasanzwe no ku itegeko rihana ibikorwa by’iterabwoba.

Abo banyamakuru ni Amir Aman Kiyaro, ukorera ibiro ntaramakuru Associated Press (AP) byo muri Amerika mu buryo budahoraho, Thomas Engida na Addisu Muluneh bakorera muri Ethiopia.

BBC itangaza ko umuryango ushinzwe kurinda abanyamakuru mu mwuga wabo (Committee to Protect Journalists, CPJ) wamaganye itabwa muri yombi ry’abo banyamakuru, usaba ko bose bahita barekurwa.

Umuvugizi wa polisi Jeylan Abdi yabwiye uyu muryango (CPJ) ko kuvugana n’umutwe leta ivuga ko ari uw’iterabwoba ari icyaha nkuko bikubiye mu itegeko ry’iki gihugu ryo guhana ibikorwa by’iterabwoba, ko ibyo atari igikorwa cy’itangazamakuru.

Umwanditsi mukuru wa Associated Press (AP)  Julie Pace yavuze ko ibi ari ibirego bidafite ishingiro, iki gitangazamakuru kivuga ko umunyamakuru wacyo amaze igihe atara amakuru ku mpande zombi ziri mu ntambara.        .