Umunyarwandakazi witwa Mukashyaka Solange n’umwana we Angela Kayitesi w’Imyaka ine, bafashwe n’abasirikare ba Uganda babakuye mu modoka yari ibacyuye mu gihugu cyabo, babajyana ahantu hataramenyekana kugeza na n’ubu.

Ikinyamakuru Virungapost dukesha aya makuru, kivuga ko bariya Banyarwandakazi babiri [umugore n’umwana we] bakuwe mu modoka yarimo abandi Banyarwanda 10 ubwo yerecyezaga ku mupaka wa Gatuna iva muri Uganda.

Bariya banyarwanda babiri bafashwe benda kugera ku mupaka, mu cyumweru gishize tariki 27 Ukwakira 2021 ubwo bariho bataha mu gihugu cyabo.

Virunga Post itangaza ko bariya bombi bafashwe bafite ibyangombwa byemewe n’amategeko kandi bitararangiza igihe ku buryo ubwo bafatwaga basabye kurekurwa ariko ngo abasirikare babafashe ntubabumva.

Ngo ubwo bakurwaga mu modoka, basanze bariya basirikare bakoze bariyeri mu muhanda hagati, ubundi babatoranya mu bandi 10 bari muri iyo modoka.

Ikinyamakuru VirungaPost cyakunze gutangaza amakuru ku mubano hagati y’u Rwanda na Uganda, kivuga ko bariya banyarwandakazi bafashwe ku itegeko ryatanzwe n’Umuyobozi Mukuru w’urwego rw’ubutasi bw’igisirikare cya Uganda CMI, Maj. Gen. Abel Kandiho.

Amakuru avuga ko mu muhanda Mbarara-Ntungamo-Kabale uva muri Uganda werecyeza mu Rwanda harimo bariyeri nyinshi za CMI ziriho abasirikare bagenda bahagarika buri modoka bagasohoramo Abanyarwanda baba bayirimo.

LEAVE A REPLY

Please enter your comment!
Please enter your name here